نواعم الافران او القرص المحشيه قرفه وسكر

المقادير

3 كوب دقيق

معلقه كبيره خميره فوريه

معلقه صغيره بيكنج بودر

نص كوب سمنه

2 معلقه كبيره سكر

رشة ملح

حليب دافي للعجن حسب الاحتياج

الحشو

سكر على قرفه

طريقة التحضير

- اول حاجه نختبر الخميرة

وندوبها مع معلقة سكر في ربع كوب مياه دافيه

ونغطيها خمس دقايق ونسيبها تتفاعل

- ننخل الدقيق ونضيف عليه البيكنج بودر ومعلقة السكر التانية ورشة الملح

ونقلبهم مع بعض وبعدين ننزل بالسمنه

ونفركها مع الدقيق لحد لما نغلف كله بالسمنه وبعدين نحط الخميره

ونعجن بالحليب الدافي بالتدريج لحد لما العجينه تلم معانا

المهم نعجنها كويس ونغطيها ونسيبها تخمر

- بعد ما تخمر نقسمها لكرات متساوية الحجم ونسيبها ترتاح 10 دقايق

وبعدين ناخد اول كوره نعمل فيها زي تجويف من النص

ونحط معلقه من السكر والقرفه

ونقفل على الحشو كويس من تحت

ونلفها علي الرخامة عشان تاخد شكل دائري

- ندهن وشها حليب بالفرشاه

وننزلها في طبق فيه سمسم عشان يمسك فيها

- نخلص الكمية كلها بنفس الطريقة

ونرصهم في صواني مدهونه زيت

ونضغط عليهم بايدينا ضغطة خفيفة

ونغطيهم ونسيبهم يخمروا مره كمان

- بعد التخمير ندخلهم فرن سخن على درجة حراره 200 لمدة ربع ساعه لحد ما يحمروا من تحت

وبعدين نفتح الشوايه ياخدوا لون من فوق

واول لما نخرجهم نرشهم مياه بالبخاخه ونغطيهم بفوطة نظيفة