فاهيتا اللحم مع صوص الجبنه الشيدر

المقادير

لتتبيل اللحمة

500 جرام لحم بفتيك

بصل چوليان الكمية حسب ما تحبي

ملعقة صغيرة بودرة ثوم

ملعقة صغيرة بابريكا

ملعقة صغيرة بودرة بصل

ملح و فلفل اسود حسب ما تحبي

¼ كوب كريمة طبخ او حلويات

بديل الكريمة زبادي بنفس المقدار

الاضافات

فلفل رومي مكعبات متوسطه الكمية حسب ما تحبي

التحضير

اخلطي كل المكونات التتبيله الاول مع اللحمة والبصل من غير الزبادي

وبعد ما تقلبيهم كويس حطي الزبادي وقلبيهم تاني

ودخليها الثلاجه 10 لـ 15 دقيقة

وفالوقت دا حضري صوص الجبنه طريقتة تحت

وقت التسويه

طاسه سخنة جدا علي درجة حرارة عاليه نزلي اللحمة المتبله مع البصل

وقلبيهم لحد ما اللحمة تستوي ( 5 لـ 7 دقائق تقريبا )

بعد ما استوت هدي النار شويه وحطي الفلفل الرومي وقلبيهم دقيقتين

وبس خلاص جاهزه

لتحضير صوص الجبنه السريع

المقادير

كوب كريمة حلويات او طبخ

كوب جبن شيدر احمر مبشور

¼ ملعقة صغيرة بابريكا

هوت صوص - HOT SAUCE ( اختياري )

ملعقة كبيرة جبن كريمي

( ممكن تستخدمي جبن مثلثات عاديه بس خرجيها من الثلاجه قبل ما تستخدميها بشوية )

ملح

التحضير

حطي الكريمة علي النار

ولما تغلي حطي الجبنة المبشورة وقلبي لحد ما الجبن تسيح

لما تسيح حطي باقي المكونات بالترتيب الموجود فوق

وانتي بتقلبي طول الوقت وبس كدا جاهز

بالهنا والشفا