المقادير
فرخه وزن كيلو وربع
تتبيله الفراخ
بصله صغيره
خل
عصير ليمونه
معلقتين سماق
فص توم كبير
معلقه كزبره نشفه مش مطحونه
معلقه عسل ابيض كبيره
ملح وفلفل وشطه
بطاطس مكعبات وفصوص توم للصنيه
زبده
الطريقه
بعد نقع الفراخ فى مايه وسكر وملح وخل ساعه
نشفى الفراخ وصفيها من اى مايه خالص
اعملى شقوق عريضه بالسكينه فى الصدور والوراك
اضربى التتبيله فى الخلاط وتبلى بيها الفراخ من جوه وبره وتحت الجلد وفى الشقوق وفصوص توم جوه الفرخه
وسبيها فى التتبيله يوم بليله عشان تطلع تحفه
بعد ما اتبلت الفراخ كويس طلعتها وولعت فحمه وطفيتها بزيت
وحطتها مع الفراخ وغطيت الصنيه بفويل عشان تتبل بريحه الدخان
قبل ما اسويها تقدرى تستغنى عن الخطوه دى عادى
هاتى طاسه كبيره وحطى زبده وسخنى الطاسه والزبده تسيح كويس
وادى للفراخ صدمه فى الزبده من كل جانب وخليها تاخد لون حلو
ضيفى معاها البطاطس والتوم مع رشه ملح وفلفل ورشه كزبره ناشفه على البطاطس والفراخ
هاتى ربع فنجان مايه ومعلقه زبده صغيره وحطيهم مع الخضار تحت الفراخ
وتدخل الفرن السخن وكل ربع ساعه نفتح عليها وناخد من مايتها و نسقيها بيها عشان تطلع طريه وجوسى
ولو شربت مايتها فى الفرن زودى حبه صغيره
بتاخد تقريبا ساعه الى ساعه ونص حسب الفرن
انا حطيتها قريبه من تحت عشان فرنى كبير
وحطيت صاجه فوق الفرخه بشويه خلتها تستوى من فوق وتحت فى نفس الوقت وكانت تحفه
استوت كويس طلعيها فوق اعلى مكان فى الفرن بدون فتح الشوايه عشان تاخد لون اكتر تحفه
وتقدم بالف هنا
رز مبهر بالعصاج
انا بيبقى عندى فى الفريزر عصاج معمول دايما الحمد لله
اخدت معلقتين كبار منه وحمرتهم فى سمنتهم على النار وزودت معلقه زيت
ونزلت ببهارات قرفه وقرنفل وحبهان وفلفل اسود
وقلبتهم فى بعض
ونزلت بالرز انا بعمل كوب ونص رز وقلبتهم مع البهارات واللحمه
ونزلت بالمايه وشويه شوربه لحمه كامت عندى والملح وسويته عادى
تغير حلو اوى وطعمه كانت تحفه وقدمته مع لوز محمص فى سمنه وزبيب متشوح فى سمنه
0 تعليقات