فراخ مشويه ومن غير جلد وواخده لون تحفه وطعم التتبيله يجنن مع رز بالخلطه وبطاطس بالاعشاب وزيت الزيتون
تتبيله الفراخ
بصلتين
فصين توم كبار
ملح وفلفل
ومعلقه زبد صغيره
ومعلقه زيت زيتون كبيرة
ومعلقه كاتشب
ومعلقه عسل صغيره
عصير ليمونه
زعتر وريحان مجفف وروز مارى بس بسيط اوى لان كتره مش حلو
وبابريكا ورشه شطه بسيطه اوى
ورشه سمسم
نشيل الجلد والجناحات ونرميهم و نغسل الفراخ كويس اوى اوى بالملح والدقيق
ونقطعها 6 قطع ونعمل فيها فتحات بالسكينه
وننقعها فى مايه واربع معالق ملح ومعلقه سكر ومعلقه خل نص ساعه كده عشان تستوى بسرعه
خاصه من مكان العظم وتحافظ على العصاره بتاعتها
اضربى التتبيله كلها فى الكبه ونتبل الفراخ بالتتبيله بتاعتنا ونغطيها فى التلاجه ونسبها اقل حاجه 6 ساعات
وياريت من قبلها بيوم او يومين اقصى حاجه الفراخ كل ما تقعد فى التتبيله بتبقى طريه وطعمها تحفه
نرص الفراخ فى الصنيه ونحط تحتها بصل حلقات وجزر وفصين توم ومعلقتين مايه
نفتح الفرن نغطى صنيه الفراخ بالفويل ونحطها فى الفرن هتنزل مايتها وتستوى هتاخد تقريبا 45 دقيقه
نفتح نتاكد انها استوت نشيل الفويل وندهن الفراخ بتتبيله
وهى معلقه زبده دايبه صغيره ومعلقه كاتشب او صلصه او باربكيو عشان تاخد لون حلو اوى
وناخد من الصوص الى نزل من الفراخ ونحطه على الفراخ عشان تطريها
نحطها تحت الشوايه ثوانى تاخد اللون التمام وتقدم انا قدمتها على صنيه البطاط
*انا هنا دهنتها بزبده وصوص باربيكيو
بطاطس ودجز بالاعشاب
🥔بنقطع البطاطس ودجز ونتبلها ملح وفلفل وزعتر وروز مارى بسيط وزيت زيتون
🥔وبقلب كله فى بعضه فى الصنيه واغطيها بفويل وادخلها الفرن على طول
🥔متسبيهاش فى التتبيله كتير عشان هتسود كده
بصى عليها بعد تلت ساعه كده لو استوت شيلى الفويل وسبيها تاخد وش ولون حلو والمايه تتبخر لو نزلت مايه
🥔وممكن ترشى عليها رشه جبنه شيدر او موتزريلا تسيح وتاخد لون معاها
0 تعليقات