طرق مختلفة للفول عشان تنوعوا فى السحور

⭕ الطريقة الأولى .. فول بالطماطم

هنحط الفول على نار أقل من المتوسطة

وفى طاسة تانى على النار هنضيف ثلاث معالق كبار زيت

ولما يسخنوا ننزل عليهم بفص ثوم مفروم

ولما ريحته تطلع ننزل عليه بمعلقة كبيرة خل ونقلبهم دقيقة

وننزل عليهم بطماطم وفلفل اخضر متقطعين مكعبات

ونقلبهم 3 دقايق مع بعض

ونضيف عليهم ملح وفلفل وكمون وبصله متقطعه مكعبات صغيرة

يتقلب كله مع بعض لمدة دقايق ونرفعه وهو سخن وننزل بيهم فوق الفول زى الطشة

ونقلبهم خمس دقايق ونرفعهم من على النار

اللى يحب الليمون يضيف عصير نص ليمونة

وبالهنا والشفا

⭕ الطريقة التانية .. فول بالطحينة

هنسخن الفول فى طبق ونعمل بره الاتى

هانجييب معلقتين كبار طحينة ونحطهم فى كوباية

عليهم معلقة كبيرة زيت ومعلقة صغيرة خل أو عصير ليمون ورشة ملح بسيطة

وممكن معلقة بقدونس مفروم

ونخففها بميه يستحسن تكون سخنة ويقلب كله كويس جدا وتكون خفيفه مش تقيلة

وننزل بيهم على طبق الفول ونقلبهم سوى دقيقتين على النار وبالهنا والشفا

وبكده الطحينة مش هتقفش أو تكلكع ماتقلقيش

وبالهنا والشفا

⭕ الطريقة التالتة .. فول بالصلصة

فص ثوم مفروم وهننزل بيه فى أربع معالق زيت يادوب تقليبه نشم ريحته

وننزل عليه بطماطماية مبشورة أو معصورة ونص كوباية مية سخنة

ورشة فلفل اسود وملح وكمون ونقلبهم لغاية ما تغلى

وننزل بيهم على الفول ونوطى النار

ونغطى عليه ونسيبهم يتسبكوا سوا

هتاكلوا احلى طبق فول بالصلصة 😋

وبالهنا والشفا

⭕ الطريقة الرابعة ... فول محمر بالسمنة

هانستخدم 3 معالق كبيرة سمنة .. هنحط معلقة واحدة الاول فى طاسة

ولما تسخن ننزل بالفول عليها والنار عاليه وهنسيبوا يتحمر 3 دقايق

بعدها نهدى النار ونقطع عليه شرايح فلفل اخضر حار أو بارد حسب الرغبة وملح وفلفل بس

فى طبق أو طاسة صغيره برة هنسخن معلقتين السمنة وممكن زبدة لغاية ما تبداء تفوور

وننزل بيها مباشرة على وش الفول ياخد صدمة

ماتتخيلوش التريكه دى بتفرق فى طعمه قد إيه

وبالهنا والشفا

 

⭕ الطريقة الخامسة .. فول بالسلطة

بتاع ساندوتشات المطاعم

هنقطع طماطم وخيار وبصل قطع صغيرة جدا (كل تقطيعه بتفرق فى الطعم)

ومعلقة بقدونس مفروم كبيرة وعصير نص ليمونه (اختيارى)

ونضيف عليهم ملح وفلفل وكمون ورشة سكر صغيرة وشطة (حسب الرغبة)

ومعاهم 3 معالق زيت كبار ونقلب الخليط ده كله مع بعض

ونسيبه 10 دقايق على جنب يتجانس ونروح نسخن الفول

لما يسخن كويس نضيف عليه الخلطة دى ونقلبها فيه ونطفى على طول

مش عاوزينها تستوى هى بتبقى فريش كده

عيش بلدى بقى واحلى ساندوتشات بيبقى روعة

وممكن نضيف طحينة حسب الرغبة

وبالهنا والشفا