اعلانااااااااااااااااااااا

فراخ بالزبده والعسل

فراخ بالزبده والعسل 

المقادير

فرخه وزن كيلو وربع
تتبيله الفراخ (ملح وفلفل وشطه وعسل وزعتر )
بطاطس قطعتها ودجز وبصله مقطعه اربع
زبده وزيت زيتون او عادى
للتلميع وللطعم المميز

معلقه زبده ومعلقه عسل ابيض وفلفل وملح خفيف ومعلقتين تلاته من صوص الفراخ الى نزل منها فى الصينيه

الطريقه

احلى حاجه فى الوصفه دى ان الفراخ مش محتاجه تتبل يومين والا حاجه
فى ساعتها الفراخ مفكوكه وتبلى ويلا شوحى هوب فرن خلصت

بحب بس انقع الفراخ فى مايه وسكر وملح وخل بدل ما اغسلها لمده نص ساعه كده على مااجهز البطاطس والحاجه
نشفى الفراخ وصفيها من اى مايه خالص

تبلى الفراخ من جوه وبره وتحت الجلد وجوه الفرخه بالملح والفلفل والزعتر والعسل وادعكيها بايديكى

هاتى طاسه كبيره حديد او مانعه للالتصاق
وحطى زبده وزيت بسيط وسخنى الطاسه والزبده تسيح كويس
وادى للفراخ صدمه فى الزبده من كل جانب وخليها تاخد لون حلو
ضيفى معاها البطاطس والبصل مع رشه ملح وفلفل وزعتر على البطاطس والبصل
هاتى ربع فنجان مايه ومعلقه زبده صغيره وحطيهم مع الخضار تحت الفراخ
وتدخل الفرن السخن وكل ربع ساعه نفتح عليها
وناخد من مايتها و نسقيها بيها عشان تطلع طريه وجوسى
ولو شربت مايتها فى الفرن زودى حبه صغيره كل شويه

بتاخد تقريبا ساعه ونص حسب الفرن
انا حطيتها قريبه من تحت عشان فرنى كبير
وحطيت صاجه فوق الفرخه بشويه خلتها تستوى من فوق وتحت فى نفس الوقت وكانت تحفه
بعد ساعه انقليها فوق اعلى مكان فى الفرن بدون فتح الشوايه عشان تاخد لون اكتر تحفه لمده نص ساعه او اقل
المهم لغايه ما تتاكدى ان الوراك استوت تماما والفرخه اخدت اللون التمام

بعد ما تطلعى الفراخ من الفرن هتكونى مجهزه صوص التلميع عباره عن
معلقه عسل كبيره مع معلقه زبده على النار وملح خفيف اوى وفلفل اسود وتقلبتين وقفلت النار ونزلت عليهم بصوص الفراخ الى نزل من الفراخ فى الصنيه وقلبتهم فى بعض ودهنت ولمعت الفراخ بيها كلها فى الاخر قبل التقديم اداها طعم ولمعه تحفه بجد
دى تقطعيها ولازم تتاكل بالصوص بتاعها الى فى الصينيه
وتقدم بالف هنا مع رز ابيض بالمستكه وعملت جمبها سلطه تفاح بالبيكان تحفه

إرسال تعليق

0 تعليقات