المقادير
800 جرام اوراك فراخ مخليه قطع كبيره
( ممكن كمان تستخدمي صدور بس الاوراك افضل علشان الدهن اللي فيها بيطلعها هايلة )
ملعقه صغيرة بودرة ثوم
ملعقه صغيرة بابريكا
ملعقة صغيرة بودرة بصل
ملعقة صغيرة السبع بهارات
¼ ملعقة صغيرة بودرة جنزبيل
¼ ملعقة صغيرة بودرة قرفه
½ كوب ماء بصل
¼ كوب خل
عصير ليمونة كبيرة
ملح وفلفل اسود حسب ما تحبي
كوب زبادي
التحضير
حطي كل مقادير التتبيله علي الفراخ بس من غير الزبادي وقلبيهم كويس
بعد كدا حطي الزبادي وقلبيهم كلهم مع بعض
دخليهم الثلاجه من ساعتين لـ 3 ساعات
في الوقت دا حضري صوص الثومية
الطريقة تحت
ملحوظة لخطوات التتبيلة
الزبادي دايماً بحطه اخر حاجه في التتبيلة بعد ما اخلط البهارات مع
( اللحمة / الفراخ )
علشان لاحظت ان الزبادي بيضيع طعم البهارات لو خلطناهم مع بعض الاول
واللي قالي وخلاني الاحظ دا الجزار بتاعي
وقت التسويه
حطيهم ف صينية وتحتيهم ورق زبده
وحطي حوليهم بصل متقطع چوليان وكام فص ثوم صغيرين
ودخليهم فرن سخن علي درجة حرارة عاليه
لمدة 15 دقيقة لكل جنب
( يعني 15 دقيقة وطلعيهم اقلبيهم ودخليهم تاني 15 دقيقة )
او لحد ماتوصلي لدرجة السوا اللي بتحبيه
ممكن كمان تشغلي الشوايه والبوتجاز مع بعض
المهم تاخد لون من الجنبين
طلعيها وبسكينه حامية اووي قطعيها شرائح رفيعة مع اتجاه نسيج الفراخ
واعصري عليهم ليمونه كبير او اكتر حسب ما تحبي
( بس الليمون اساسي علشان طعم الساندويش يكمل )
لتحضير صوص الثومية
صوص الثومية الاصلي اللي بالبيض والبديل اللي النشا
المقادير
بياض بيضة
بديل البيض
( كوب ماء + 3 ملعقة كبيرة نشا - طريقتها مكتوبه تحت )
ملعقة صغيرة ثوم مفروم
¼ كوب زيت
ملعقة كبيرة زبادي
2 ملعقة كبيرة لبن
¼ كوب مايونيز
عصير ليمونه صغيره
ملعقة صغيرة خل
ملح حسب ما تحبي
التحضير
1- الطريقة الاصلية
في الكبه او الخلاط
حطي بياض البيض واضربيه كويس لحد ما القوام يبقى ابيض خالص وعامل زي الكريمة كدا
بعد كدا حطي باقي المقادير كلها مع البياض بعد ما جهز واضربيهم كويس اووي
وبس خلاص خلصتي
دخليها الثلاجة مش اقل من ساعه قبل التقديم
التحضير
2- الطريقة البديلة
دوبي النشا في المياه وحطيها علي النار
وانتي بتقلبي طول الوقت لغاية ما تتقل ولونها يبقي شفاف قلبيها مش اقل من 5 دقائق
بعد ما تتقل علشان النشا تستوي وطعمها مايبنش الخطوية دي مهمه
سبيها تبرد خااالص وحضري صوص الثوم
في الكبه او الخلاط حطي كل المقادير مع بعض واضربيهم كويس اووي
بعد كدا حطي معاهم خليط النشا اللي بردت ( علي مرتين )
واضربيهم تاني في الكبه لحد ما كله يتجانس مع بعضه
خلاص كدا خلصتي
دخليها الثلاجة من ساعتين قبل التقديم
ملحوظة للطريقة البديلة للثومية
ممكن متحتاجيش انك تحطي خليط النشا كله
يعني بعد ما تحطي النص الاول دوقيها وشوفي قوامها وبعدها قرري
0 تعليقات