بيف بيكون مشروم برجر بصوص الجبنه الشيدر

 

شوية نصايح قبل المقادير

* العيش اهتموا بالعجن جدا وحسو بالعجين

وانتوا بتعجنوا طري ناشف عايز دقيق عايز لبن كدا يعني

( اضافه الدقيق للخليط السائل واحده واحده هيساعد انكوا تعرفوا تضبطوا قوام العجين اسرع )

* وطبعاً قبل العجن المقادير لازم تكون مظبوطه

* البرجر .. انا عن نفسي مبحبش اي اضافات خالص علي اللحم هو ملح وفلفل

بس وقت التسويه بس بيكون احلي 100 مره

وبيدي طعم البرجر الحقيقي المشوي

دا زي بتاع بلاد برا وكدا 😋 وبيكون چوسي خالص من جوا

المهم تكون حته لحمه حلوه اللي مفرومه ( انا استعملت انتركوت ) فيها 20%؜ دهون

صوص الجبنه

* استعملوا انواع جبنه حلوه تكونوا بتحبوا طعمها

مش شرط تكون غاليه المهم انها تدينا نفس النتيجه

المقادير والطريقه

العيش

( وطبعاً اللي عايز يوفر علي نفسه مجهود العيش يشتري عيش جاهز نوع حلوو )

بس طريقه العيش دي هتفرق جدا فالطعم العام

2 كوب لبن دافي

كيس خميره فوريه

م ك سكر

2 م ك زبده

2.5 لـ 3.5 كوب دقيق

بيضه

اللبن والخميره والسكر مع بعض ونسبهم 5 دقايق الخميره تشتغل

بعد كدا البيضه والزبده ونقلبهم

وننزل بالدقيق كوبايتين ونعجن وبعد كدا هنزود دقيق شويه بشويه

لغاية ما العجينه تلم بعد كدا 10 دقايق عجن كويسسسس

هنسيب العجين يخمر 45 دقيقه وبعد كدا هنشكله ونسيبه يخمر تاني 30 دقيقه

بعدها هندهن وشه بصفار بيضه

( سمعاكوا يالي هتقولوا هيبقى زفر )

متقلقوش خالص خالص

ونرش ع الوش سمسم او سميد ايوه بتاع البسبوسه دا

وندخله ف فرن سخن ع درجه حراره 230 لمده 15 لـ 25 دقيقه

ولما يطلع نغطيه لغاية ما يبرد خالص

البرجر

نقسم اللحم المفروم كور وزن واحد ( 100 جرام ) ونبدا نشكلها

تسوية البرجر 3 دقايق لكل وش علي نار عاليه

وهنرش ملح وفلفل عليه وهو علي الجريل

صوص الجبنه العظيم

2 م ك زبده

2 م ك دقيق

1 علبه كريمة طبخ

م ك جبن شيدر كوبايات

1 ونص كوب جبن شيدر احمر مبشور

رشة بابريكا ورشه ملح حسب ما بتحبوا

الزبده تسيح ع النار وبعد كدا الدقيق يتحمر شويه وننزل ب كريمة الطبخ

ونقلب لغاية ما نوصل للقوام زي البشاميل كدا نطفي النار ونحط

ونقلب لغاية ما الجبنه كلها تسيح ونظبط الملح ورشه البابريكا

لو تقل منكوا زياده بشويه لبن قليلين ونقلب كويس

لو كانت الجبنه لسه سخه مش هنولع النار

لكن لو برد يبقي هنولع نار هاديه جدا واحنا بنقلب

الاضافات

بيف بيكون متشوح ف شويه خفيف

ومشروم متشوح ف نفس المكان اللي شوحنا في البيكون

هنحتاج كمان

خس متقطع

وبصل متقطع دواير رفيعه اوي

خيار مخلل متقطع صغير

كاتشاب