لازانيا بالسبانخ

المقادير

باكيت لازانيا 400 جرام

2 كوب سبانح طازه مفرومه

ربع كيلو مشروم شرايح

معلقه كبيره زعتر فريش

4 كوب جبنه موزاريلا "النوع اللي بستخدمه اسمه يونيفرسال"

كوب جبنه شيدر "النوع اللي بستخدمه اسمه افانتي"

بصله

فصين ثوم مفروم

زيت زيتون

4 كوب لبن بدرجة حرارة الغرفه

3 معالق زبده

3 معالق دقيق

معلقة ملح صغيره

معلقة فلفل صغيره

معلقة قرفه صغيره

ربع معلقه صغيره جوزة الطيب

معلقتين كريمه أو قشطه

2 كوب صلصة طماطم

طريقة التحضير

نشوح البصل والثوم مع زيت الزيتون والزعتر وبعدين نحط المشروم ونسويه وبعدين نضيف السبانح مع رشة ملح ورشة فلفل اسود ونقلب 2 دقايق لحد ما السبانخ تدبل

لو حابين تضيفوا لحمه مفرومه شوحوا اللحمه الاول وبعدين ضيفوا عليها السبانج

طريقة البشاميل

نشوح الدقيق مع الزبده على النار ولازم نقلب كويس جداً لحد ما الدقيق يستوي

نضيف اللبن بالتدريج ونقلب كويس عشان ميبقاش فيه كلاكيع في البشاميل

ونديله التتبيله بتاعته بقى الملح والفلفل والقرفه وجوزة الطيب وبعدين نضيف معلقتين الكريمه او القشطه

هنسلق اللازانيا نص سوا في ماء مملح متضاف معاه معلقتين زيت وبعدين نطلعها نحطها في مياه بارده بمكعبات تلج عشان اللازانيا ماتلزقش مع بعضها

ملحوظه

سلق اللازانيا بيكون شريحه او اتنين بالكتير واستخدمي معلقه خشب للتقليب

نحمي الفرن على 170 درجه مئويه

نجيب صينيه بايركس وندهنا زبده ونبدأ نرص اللازانيا ونفرد عليها طبقه خفيفه من السبانخ والمشروم او اللحمه مع طبقه خفيفه من البشاميل وصلصة طماطم

نكرر نفس الخطوه دي مع باقي الطبقات وهكذا لحد اخر طبقة لازانيا على الوش نختمها بإضافة الجبنه الشيدر والموزاريلا

غطي الصينية بورق فويل ودخليها الفرن لمدة 40 دقيقه وبعدين طلعيها وشيلي ورق الفويل ودخليها الفرن لمدة 10 دقائق كمان علشان الوش يستوي وياخد لونه طلعيها ورشي على الوش زعتر مطحون مع ريحان وسيبيها تهدأ ربع ساعه قبل التقديم عشان تمسك في بعضها