-->

إكلير بالكاسترد وصوص الشيكولاتة



المقادير

مقادير العجينه

كوباية دقيق
كوباية مياه
ربع كوباية زبده
3 بيضات
معلقه صغيره فانيليا سايله
نص معلقه صغيره ملح

مقادير حشوة الكاستر

كوباية لبن
صفار 3 بيضات
رشة ملح
نص معلقه صغيره فانيليا سايله
ربع كوباية سكر
2 معلقه كبيره نشا

مقادير صوص الشوكولاته

ربع كوباية كريمة خفق
نص كوباية شوكليت شيبس او شوكولاته خام
معلقه صغيره عسل
معلقه صغيره فانيليا سايله

الطريقه

اول حاجه نجهز الحشوه نسخن كوب اللبن على النار لحد ما يسخن شويه بس مش هنخليه يغلي
في طبق غويط نخفق صفار البيض مع السكر والنشا والفانيليا ونركنه على جنب
نحط اللبن على الصفار مع التحريك السريع بالمضرب السلك
نحط الخليط على النار ونقلب بس لحد ما الكتل تختفي ويتقل
نرفعه من على النار ونسيبه لحد ما يبرد ولازم نغطيه بنايلون ستريتش 
او كيس بلاستيك عشان مايعملش قشره ويفضل كريمي

طريقة التحضير

في طبق على النار نحط المياه مع الزبده لحد ما تغلي
ننخل الدقيق ونضيفله الملح وننزل بيه على المياه والزبده مره واحده 
ونقلب بسرعه بمعلقه خشب لحد ما الدقيق يختفي خالص والعجينه تبقا متماسكه
نرفعها من على النار ونسيبها تبرد حوالي 5 دقايق
نحط بيضه واحده مع معلقة الفانيليا ونخلطهم كويس لحد ما البيضه تختفي
نحط البيضه التانيه ونقلب لحد تختفي والبيضه التالته بنفس الطريقه
نسخن الفرن على 200 درجه
نجهز صينيه كبيره ونفرد فيها ورق زبده
نشكل العجينه بايدينا بالطول زي العيش الفينو 
او نحط العجينه في القمع ونشكلها صوابع طويله ونرصها في الصينيه
ندخل الصينيه الفرن على درجة حراره 200 لمدة 25 : 30 دقيقه 
وبعد مايستوي ولونه يبقا دهبي نطفي الفرن ونسيبه 5 دقايق والفرن مطفي ومقفول 
وبعدين نخرجه من الفرن ونسيبه يهدا خالص
نفتح صوابع الإكلير بسكينه مشرشره من الجنب زي السندويتش ونحشيها بالكاستر باستخدام القمع

تجهيز صوص الشوكولاته للتزيين

نخلط الكريمه مع العسل والفانيليا ونحطها على النار لحد ما تسخن
نرفعها من على النار وننزل عليها بالشوكليت شيبس او اي نوع شوكولاته تحبوه 
ونقلب بسرعه لحد ماتدوب خالص
نغطي صوابع الإكلير من فوق بصوص الشوكولاته ولما الصوص ينشف على الاكلير ممكن تسيحوا شوكولاته بيضا على حمام مائي وتعملوا بيها خطوط زي مانتوا شايفين كده وبالهنا والشفا

التسمية

عن الكاتب :

انا ورقه طارت 🍂 من شجر نادر 🌳 حطت على أرض بور 🌱

ليست هناك تعليقات

إرسال تعليق

الاسم

بريد إلكتروني *

رسالة *