سندويتش تورتيلا باللحمه المفرومه والجبنه الموتزاريلا مع التوميه وصوص الطماطم الحار

المقادير

معلقة زبده

ربع كيلو لحمه مفرومه

رشة فلفل اسود

رشة ملح

رشة قرفه

رشة بهارات لحمه 

ربع كباية بصل مفروم

ربع فلفل أخضر

معلقة صلصة طماطم

ربع كباية مياه

2 رغيف تورتيلا

جبنه موزاريلا

الطريقه

هندوب الزبده على النار ونضيف اللحمه ونقلبها لحد ما ميتها تتشرب ولونها يتغير

نتبلها بالملح والفلفل الاسود والبهارات والقرفه

نضيف البصل والفلفل الأخضر ونقلب لحد ما البصل والفلفل يتبلوا 

وبعدين نضيف معلقة الصلصله وربع كباية المياه ونقلب كويس لحد ما اللحمه تستوي

نحط رغيف عيش التورتيلا في طاسه تيفال على نار هاديه

ونفرد الجبنه الموتزاريلا ونحط فوقها اللحمه ونحط موتزاريلا على الوش 

ونلف العيش ونقفله زي اللي في الصوره كده 

نقلب الرغيف على الوشين لحد ما الوشين يتحمروا

نكرر نفس الخطوات دي مع الرغيف التاني وبالهنا والشفا

طريقة التوميه

3 معالق كبيره نشا

كوب الا ربع مياه

3 فصوص توم

4 معالق كبيره زيت نباتي

معلقه صغيره عصير ليمون

نص معلقه صغيره ملح

الطريقه

نحط النشا مع المياه في طبق على النار

ونحركها لحد ما تدوب على نار هاديه خالص ونستمر في التقليب لحد الخليط يبقى تقيل نرفعه من على النار ونسيبه يبرد شويه

نفرم التوم ناعم جدا ونحطه في الخلاط مع عصير الليمون والملح 

وبعدين نضيف خليط النشا ونضربهم لحد قوامهم يبقا متماسك

نضيف الزيت بالتدريج والخلاط شغال لحد ما نوصل للكثافه المناسبه واللون الأبيض الكريمي

لازم نحطها في التلاجه اقل واجب ساعه قبل التقديم

طريقة الصوص

2 قرن فلفل حامي مفروم

فصين توم مفرومين 

بصله صغيره مفرومه 

كبايتين صوص طماطم 

معلقتين زيت 

نص معلقة ملح 

نص معلقه صغيره فلفل اسود 

نص معلقة شطه حمرا

الطريقه

نسخن الزيت على النار ونشوح فيه البصل لحد ما يتبل

نضيف التوم والفلفل الحامي ونقلب لحد ما الفلفل يطرى

نصب صوص الطماطم

نهدي النار ونضيف التوابل

نسيبها الصلصه على النار لحد ما تغلي ونرفعها ونسيبها تبرد خالص وبعدين نقدمها