أسرار الملوخية

 

اولا : الشوربة

والشوربة اول حاجة ممكن تفرق معانا كتير اوي في طعم الملوخية

1- اي كانت اللحوم اللي هنعمل الملوخية عليها سواء كانت لحمة او فراخ او بط او ارانب

لازم نشوحها الاول في معلقتين سمن محترمين ومعاهم فصين او ثلاثة مستكة

ونشوحهم كويس اوي اوي من كل الجوانب وبعدين نحط عليهم الماية علشان يستووا

2- التوابل اللي بتتخط مع اللحوم اثناء السلق بتأثر لدرجة كبيرة جدا في طعم الشوربة

وبالتالي في طعم الملوخية فالتوابل المطلوبة

( ملح مظبوط / فلفل اسمر / جنزبيل بودر وده مهم جدااااا / قرفة ناعمة / فصين حبهان ولازم نكسرهم قبل ما نحطهم لان النكهة موجودة في الحبوب الداخلية الموجوده بداخل الحبهان / فصين مستكة تاني / ورق لورو / بصله مشقوقة الي شقين متعامدين)

3- نظبط ثقل الملوخية يعني ماتكونش خفيفة

ولا ثقيلة ا كجم ملوخية يلزمه 2 لتر شوربة

ثانيا : الثوم

وهو ثاني مؤثر فظيع في ريحة الملوخية وطعمها

1- الثوم لاااازم يكون طااازج يعني مش مركون في الفريذر

ولو على اسوأ الفروض استخدمنا الثوم المفرز يكون ليس لاكثر من شهر بالكتير اوي

2- كمية التوم الكافية لعمل 1 كجم ملوخية هي 2 معلقة كبيرة مليانة

3- يجب علينا تتبيل الثوم اثناء تقليته يعني

ملح / فلفل اسمر / كسبرة ناشفة / جنزبيل بودرة

4- نوعية السمن اللي هنقلي فيها الثوم بتفرق كتير اوي في الريحة والطعم

5- يجب وضع الملوخية على الشوربة

وهي ساخنة لكن قبل مرحلة الغليان بحوالي 5 دقايق يعني الشوربة تكون سخنة اه

لكن مش بتغلي علشان الملوخية ماتغليش مع الشوربة

وتسقط في قاع الحلة وعدم تقليبها نهائيا

6- بعد تقلية الثومة بالتوابل وصبها فوق الملوخية يجب تغطية الملوخية فورا

ولمده دقيقة واحدة فقط لحين هبوط الغازات الطائرة والمحملة برائحة الثوم والمتصاعدة في البخار الناتج عن صب التقلية على الملوخية لتهبط هذه الابخرة الى الحلة مرة اخرى

دقيقة واحدة بس ونرفع الغطا تاني

7- في هذه المرحلة ممكن نقلب الملوخية تقليبة واحدة

وناخد مغرفة من الملوخية نصبها في الطاسة مكان التوم

لنخرج بها كل التوابل الملتصقة في الطاسة لانها محملة باجمل النكهات

8- بمجرد اننا نلاقي الملوخية بداءت تغلي من الجوانب

نخفف النار شوية ومع اول غلوة نطفي البوتاجاز

ونقلب تقليبة كمان ونظبط الحياق تاني

ونتركها 3 دقايق قبل ما نغرف في الطبق

9- ممنوع نهائيا نغطي حلة الملوخية الا بعد ان تبرد تماما ولو هي في الثلاجة

وعايزين نسخنها تاني يوم لازم ترفع الغطاء قبل ما نولع النار عليها