وصفات الشيف يسرى
المقادير
فرخة كاملة
نص كوب زبدة
2 ملعقة كبيرة زعتر
2 ملعقة كبيرة عصير ليمون - ليمونة كاملة كبيرة
بشر ليمونة
كسبرة ناشفة
بهارات ملح وفلفل
الطريقه
نجيب الفرخة ونغسلها كويس أوي وانا هنا جبت فرخة بلدي بس براحتك لو بتحبي الفراخ البيضا مفيش مشكلة بس الفرخة تكون صغيرة مش كبيرة علشان مايكونش فيها دهون وكمان تستوي بسرعة
ونفصل الجلد عن اللحم
بعد كده نعجن الحشوة مع بعضها وعلى فكرة بالنسبة للناس اللي بتعمل ريجيم ما يخافوش خالص من الزبدة اللي هتحشوا بيها الفراخ هي هتدي لون ذهبي بس للجلد من بره وهتسيح وهتنزل كلها مع الصوص
وممكن تكبيها بعد ما الفرخة تستوي
غير كده احنا بنشيل جلد الفراخ عند الأكل
بعد كده نجيب صينية نخرط فيها بصلة كبيرة وتكون متبلة بالملح والفلفل
وممكن نحط عليها أعواد زعتر
بعد كده نتبل الفراخ ونحشيها بالحشوة من الجلد واللحم
ونكتفها كويس جدا نلف الجناح من ورا عكسي
والوراك ممكن ندخلها في الفرخة نفسها او نلفها بخيط دوبارة
ونحطها فوق البصل في النصف
ندخلها فرن يكون متسخن قبل كده ونسيبها لمدة 10 دقائق على نار عالية
ونخرجها تاني نلفها بورق سيلفر
بعد كده ندخلها الفرن على نار متوسطة
نسيبها لمدة نصف ساعة وبعدين نهدي عليها النار ونسيبها تستوي براحتها ع الهادي
بعد كده نعمل الأرز
نقول بقا الطريقة أنا أخدت الكبدة والقناصة والقلب بتاع الفرخة قطعتهم قطع صغيره اوي وقطعت بصلة متوسطة شوحتهم في الزبدة وشوية زيت ذرة صغيرين
(لازم تحطي زيت علشان الرز مايلزقش منك)
وحطيت معاهم زبيب ولوز مقطع
(ممكن سوداني مقشر بيكون أحلى واطعم)
ومعلقة كبيرة نعناع ناشف ومعلقة كبيرة كركم ومعلقة كبيرة قرفة وملح وفلفل
بقلبهم كويس وأحمرهم في الزبدة
بعد كده بنضيف الرز للخلطة دي وبنكون ناقعينه شوية في الميه
بعد كده ضفت له الشوربة وسبته يستوي بالطريقة العادية
بعد كده الفراخ استوت وطلعتها من الفرن وده كان شكلها
وبعد ما الرز استوي حطيت الرز على طبق سيرفيس كبير وصوص الفراخ من حواليه
وحطيت الفرخة في النصف
0 تعليقات