البيتزا الايطالى

 

مجرد تعديل بسيط فى طريقه البيتزا المعتمده عندى الى هيا عجينه العشر دقايق فرق بسيط فى المقادير

وطريقه التخمير خلاها بجد تحفه بيتزا زى بتاعه بابا جونز كده البيتزا الايطالى المقرمشه الجميله

طريقه العجينه

المقادير

4 كوب ونص دقيق ( بستخدم الضحى )

كوب ونص ماء دافىء

معلقه صغيره خميره فوريه

(بكمايا احسن خميره فى الدنيا متوفره فى كارفور)

معلقتين زيت زيتون

زعتر وملح

سميد بسبوسه ( استخدمت فايف ستار ) ودقيق للفرد

الطريقه

هتاخدى كوب ونص دقيق وتحطى عليهم كوب ونص مايه دافيه والخميره

وتقلبى وتغطى الطبق وسبيه فى مكان دافى مغلق لمده 10 دقايق او اكتر

هتلاقى العجينه اللينه عملت فقاقيع وعليت لفوق شويه كده تمام الخميره شغاله

هترشى رشه ملح وزعتر وتنزلى ب 3 كوب الدقيق بالتدريج مع العجن بالراحه

لغايه ما العجينه تلم وتخلصى المقدار بتاعك بس سيبى حبه دقيق على جنب من المقدار بتاعك عشان ينفع فى العجن

انقلى العجين عاى الرخامه مع رشه دقيق واعجنى ومطى فيها

واضربيها بالبوكسات فى وشها وارفعيها واهبديها على الرخامه

عايزكى تبهدلى العجينه على الاخر هوه ده سر العجينه الممتازه

العجينه بقت تمام وناااعمه وجميله هاتى طبق غويط واعملى العجينه كوره وحطى معلقتين زيت الزيتون

وغلفى العجينه كلها بيهم وغطى الطبق كويس اوى وحطيه فى مكان دافى مغلق

شيلى العجينه لغايه ما تخمر براحتها ويتضاعف حجمها ممكن تاخد ساعه او اكتر على حسب الجو

العجينه خمرت تمام طلعيها وقطعى العجينه ل 3 قطع متساويه زى الصوره

هاتى طبق ورشى عليه رشه دقيق سميد بتاع البسبوسه ودقيق عادى

وغلفى حته العجينه من فوق ومن تحت بيهم كويس وحاولى متطلعيش الهواء اوى من العجينه

تمام كده غلفى الطبق بقى بللاستيك فيلم زى الصوره

وحطي الطبق فى التلاجه لمده ساعه او لغايه ما العجينه تخمر تانى الخطوه دى معمه جدا

وياسلام لو تبات ليله فى التلاجه يبقى تمام جدا وزى الفل

هنا انا سبتها لغايه ما خمرت بس وكانت نتيجه رائعه جدا الحمد لله

✍🏻اهم الخطوات والملحوظات

من اهم الخطوات بقى انك تفتحى الفرن من بدرى جدا وعلى اعلى درجه وتخلى الصاج قريب من النار

ولو عندك صاج تانى ياربت حطيه فوق صاج البيتزا بشويه بكده

هنخلى الفرن بتاعنا زى فرن البيتزا بتاع الكافيهات *(فى صوره توضح)

احنا هنسوى البيتزا على ورق الزبده لازم يكون نوع ممتاز زى فالكون

بس تاكدى انه النوع الى بيدخل الفرن لان في منه نوع لفرد العجين بس

خلصنا هتجيبى طبق رفيع كده وتنقلى عليه ورق الزبده الى عليه عجينه البيتزا

وانقليها الفرن من غير الطبق بورق الزبده بس

وارميها على الصاجه السخنه المفروض تاخد حوالى 90 ثانيه مش هتاخد وقت خالص بصى عليها بعد دقيقه واطمنى

اخدت لون كويس من تحت

طلعيها لاعلى مكان فى الفرن عشان الجبنه تسيح كويس وتاخد لون

وممكن كمان تفتحى الشوايه لمده ثوانى مع المراقبه بحذر

لو بتحبى الجبنه تاخد لون جامد بالنسبه ليا بفضل الجبنه بدون لون

وطلعيها بقى وادعيلى دعوه حلوه

*الجبنه الموتزريلا المستخدمه دومتى بريميم الجديده جبنه طبيعيه ميه فى الميهDomty

والشيدر صفراء نيوزلندى او هولندى والرومى وسط من السوبر ماركت عادى

ولازم لازم تكون الجبن كلها بدرجه حراره الغرفه

اوعى تكون مجمده او ساقعه لافضل نتيجه ويفضل تبشريها فى الكبه بشر ناعم